العيد هو أن نشمّ ريحة الكعك المخبوز طازج بالبيت من ايدين ربّات البيوت “الله يطوّل بعمرهم” وهدا العيد قررت تيتا انه مستحيل يمر  بدون كعكاتها الشهيرة رغم أننا بإجازة و صيف و سفر،  فالبداية قالت انه فقط رح تعمل مقروطة لكن انتهى الموضوع بصواني متعددة للمقروطة (المعمول بتمر) و كعك بفستق و حتى معمول بالحلقوم

على قول تيتا أهم شي العجينة ازا عملتو العجينة صح إذن بتقدروا تضيفوا أي حشوة وبصير كعك العيد. طبعا ما بدي أقلكم عن معاناتي  لما حاولت آخد المكونات و المقادير من تيتا. مش لانها سرية لا لا لا. بس لانه تيتا بتحط مقاديرها بإيدها. الحجة بتقول: لسانك وعينك هم مقاديرك بتحطي وبدوقي وبتزيدي على هواكي لتمسك العجينة معاكي

مقادير العجين

٤ أكواب سميد ناعم

١ و نص كوب طحين

١ ونص كوب زيت نباتي

تعجن المقادير الثلاثة الي فوق معا قبل بيوم من بداية العمل و تترك مغطاة ٢٤ ساعة 

وقت العمل يضاف للعجين

١ ملعقة طعام محلب مطحون

١ ملعقة طعام يانسون مطحون

نص ملعقة طعام ماء زهر

٢ ملعقة طعام سمسم

١ ملعقة طعام خميرة فورية

رح تحتاجي لعجنهم مع بعض حوالي ١ و نص كوب حليب دافئ

حشوة التمر

١ كيلو تمر منزوع النوى يعجن مع ٢ ملعقة طعام زيت زيتون و ملعقة طعام يانسون مطحون و ربع ملعقة طعام قرفة مطحونة و نص ملعقة صغيرة جوزة الطيب مطحونة

بدأت أول مرحلة من تحضير المقروطة ببسّ السميد بالزيت ، فعل “بسّ” يعني فرك السميد بالزيت بين اليدين منيح لليتشربه مضبوط مضبوط. و بعدين يغطى بفوطه و يترك لثاني يوم للشغل فيه

جاء يوم العمل، و تجمعوا خالاتي كلهم لمساعدة تيتا لحتى تفّضل مرتاحه و ما تتعب حالها لكن حالها حال كل تيتاتنا مستحيل تقتنع الا بشغل إيدها، أي شي نعمله ترجع تشوف ورانا و تحب شغلتها على طريقتها

 

 نادت كل كبير و صغير ليشتغلوا و هالبنات يتركوا التليفونات و يتعلموا و بلشت شغل بالتكبير و التهليل: الله اكبر ، الله اكبر، لا الاه الا الله، الله اكبر ، الله اكبر ، و لله الحمد

 

توزعت المهام بأنه كانت ماما هي الايد اليمنى لتيتا، و بنات خالاتي يفردوا التمرو أعطت مهمة الفرن والخبيز لخالتي وسام لأنه على رأي ستي: “لو وسام مسكت هالعجينة هتفرطها” و طبعا أنا كنت المصوراتي و الدي جي ببعض الأوقات هههههه

الفيديو التالي رح يوضح خطوات العمل بالصور، أنا شخصياً كنت مفكره الموضوع معقد لكن طلع أبسط من البساطة

 رح اشرحلكم شوي و بعدين رح أترككم مع الفيديو، بعد تحضير العجينة أخدت تيتا جزء منها و مدته بالشوبك على طاولة مرشوشة طحين بهدا الوقت كان التمر المرقوق جاهز ( امسحي اليد بشوية زيت زيتون و رقي التمر المنزوع النوى بين الأصابع حتى يصيررقيق متل الصوره) رصّت تيتا التمر فوق العجين الممدود و بعدين بدأت تلف العجينة من تحت لفوق مع ضعطة بسيطة جداً حتى لا يتكسر

   ثم رصّتها شوي لتصير مسطّحه و رشت عليها السمسم ثم استخدمت السكين لعمل شكل خطوط خفيفة مايله و رجعت عكست السكين الناحية الأخرى لتعمل خطوط عكس الأولى و نقلتهم عالصواني المدهونة شوية زيت تجهيزاً لدخولهم عالفرن

 

 

جهزت تيتا مقروطة بتمر و كعك بفستق متل مذكرت قبل، سر تيتا للكعك الناجح هو العجينة. ما بحتاجوا وقت كتير بالفرن عشان هيك ما رضيت خالتي وسام تتحرك من جمب الفرن مجرد يصير لونهم زهر من تحت معناته جاهزين

مهما وصفتلكم فرحتي بالأجواء ما رح أعرف أوصللكم الإحساس الجميل و نحنا صايمين و عمنشتغل بروح وحده و بنكبر تكبيرات العيد وشوي تيتا بتحنّ لأيام زمان و بتحكيلنا حكايا زمان و كيف هي نفسها تعلمت طريقة عمل الكعك و طبعا نحنا نندمج و نبدأ نغني ٣ دقات تقوم تيتا تسكتنا و تغني أغاني قديمة بصوتها الحنون و الصواني الي تجهز تتناقلها الإيدين لتوصل للفرن الي تدخله دقائق و تطلع و تفوح ريحة الكعك بالبيت كله، و طبعا أكتر طريقة تقليدية و جميلة للمعايدة عالجيران و نقلهم: كل عام و آنتم بخير من بكير، هي أنه نبعتلهم صحن من كعكاتنا و هم بعدهم سخنين

 تيتا أم محمد بتقلكم: للي بحب ممكن ترشوا عليهم سكر بودره للزينه و طعم أحلى بس هي ما بتحط عليهم عشان جدو ما بحبهم بسكر

قضينا بالمطبخ أربع ساعات نحضّر كعك العيد، قضينا أربع ساعات بالمطبخ نكبّر ونعجن و نغني. قضينا أربع ساعات نسمع حكايات تيتا وجدو. قضت خالتي أربع ساعات بجانب الفرن تخبز الكعك. لكن كان فعلا وقت جميل تشاركته مع عائلتي و فوق  راسنا تيتا بحنيتها و عدم بخلها بتعليمنا كل شي حلو و إن شاء الله كل سنة نقضي وقت ممتع مع اهلنا وحبايبنا  

كل عام و أنتم بألف خير و بالصحة و السلامة

 

 

Written and Edited by: Sara Allouh